|
Kultur isch teuer 
2 Personen: Ehepaar
Schild „Garderobe“
Er: Gugg mol do, des kann doch net sei! Die wellet für’d Gardrobe oin Euro!
Sie: Was? Oin Euro! Ha die nehmet’s von de Lebiche.
Er: Um des Geld könnet mr unsre Kittel obhalta.
Sie: Do schteht aber „Garderobenpflicht“!
Er: Des hätt mr bälder wissa solla, no hätta mr’s im Auto glassa!
Sie: Des machet die mit Fleiß.
Er: Do ghört auf’m Parkplatz a Schild no, dass mr’s weiß!
Sie: Was solla mr jetz macha?
Er: Wia mach’n des dia ondere Leit?
Sie: Die zahlet.
Er: Des sieht dene gleich! Des sind beschtimmt koine Schwoba!!
Sie: Ins Handtäschle ko i’s net neischtopfa!
Er: Gibt’s do draußa koine Hoka?
Sie: Und wenn, nachher sind d’Kittel weg!
Er: Hasch du an Geldbeutel drbei?
Sie: Hasch du koin?
Er: Vielleicht könna mr beide Kittel auf oin Hoka hänga?
Sie: Oder zu ebbern onderscht drzua?
Er: Noi, do gugg, die nehmet jeden oinzeln.
Sie: Au net für Ehepaare, ab fuffzich vielleicht?
Er: Zeig doch mol dein Rentnerausweis!
Sie: Oder s‘Monatskärtle für’d Schtroßaboh?
Er: Irgendebbes wird doch z’macha sei!
Sie: Früher hat’s 10 Pfennich koscht.
Er: Koi Wunder, dass die Theater ums Überleba kämpfa!
Sie: Wenn mr gwisst hätt, dass unsre Freikarta mit solche Ukoschta vobunda sind, no hätta mr se besser weitervoschenkt...
|
