...koi Fisch?

Vor a paar Wocha war i mit meine Kinder in a ma neua, riesagroßa Zoo-Center. Früher hätt mr's Tierhandlung gheißa, aber weil heut alles größer sei muass, geht's jetzt nimme ohne Center.

Was mi am Ofang am ärgschta beeindruckt hat, waret die gigantische Menga an Hunde- und Katzafutter, die hier haushoch gschtapelt waret. In meinem enga Kleinbürgerhirn hat sich diese Masse sogleich in Hunde- und Katzahäufla verwandelt und diese Vorschtellung hat mi schiergar erschlaga. An notwendigem und sonschtigem Zubehör hatt's alles gäba, was mr sich bloß hat denka könna.
Unsere Haustierla brauchet heut wirklich koi Not mehr leida. Selbscht in dr kloinschta Goldhamschterkischta herrscht heut der Überfluss. Es gab sogar die Möglichkeit, des ganze angebotene Zeugs auf Rata zu kaufa. I selber däd zwar nie auf die Idee komma, des Futter für unsere Zwerghäsla per Finanzkauf zu erschteha, aber so Leut muass es ja geba, sonscht däd mr so an Schwachsinn net obieta.

Mit immer größere Auga bin i durch die Gänge voller Papageia und Wüschta- schpringmäus getorkelt, dass i fascht dr Mund nimme zuabracht hab. In dr Zier- fischabteilung aber, da hat mi's so richtig gschlenkert! Plötzlich bin i vor einem Mega-Koifischbecka gschtanda und hab beim Anblick der Preislischte regelrecht Schtielauga kriagt. Do waret tatsächlich Fisch für sage und schreibe 20.000,-- Mark (oder 10225,84 Euro) im Ogebot.

Dass ein norwegischer Wildlachs relativ teuer isch, war mir bisher scho bewusst, doch dass ein original japanischer Zierkarpfa eine Geldanlage ischt, war mir jetz neu. Dr Verkäufer hat gmoint, so Fisch wäret des durchaus wert, do däd an Haufa Zuchtarbeit drinschtecka. Aber 20.000,-- Mark für ein glitschiges Fischle - Japan hin, Zucht her - war mir persönlich des Vergnüaga net wert.

Der Fischverkäufer isch ganz beschtimmt kurz vor-her auf ma Lehrgang für suggerierende Kundabeeinflussung gwä. Der hat jetzt sei ganzes Repertwar (Repertoire) über die Zucht und Haltung dieser edlen Koifisch zoga und mir fascht bildhaft dr gröschte Fischbeschtand ins Wasser gsetzt. S'däd grad gnuag Leut geba, die hättet solche herrliche Fisch im Wert von ra Viertelmillio im Vorgarta schwimma. Der Koi wär heut Ausdruck von Kultur und Vermöga zugleich. Wer heut koin Koi hätt, wär von geschtern! Koi müasst mr haba!

I hab mi, weil i seither noch koi Koi im Garta ghabt hab und mir au koine oschaffa wollt, a bissle wie an Außaseiter gfühlt. Der Fischhändler hat mir deswega ein richtig schlechtes Gwissa aufgschwätzt, dass mir's ganz uwohl worda ischt. Aber i ko doch net oifach für so ebbes a Viertelmillio ausgeba. Solche Geldausgaba lohnet sich vielleicht für a Häusle oder eventuell für d'Frau, aber doch net für andere Viecher!

Nun, der Kundafänger in sellem Zoo-Center isch natürlich hartnäckig blieba. Der hat so lang babbelt und babbelt, dass i doch tatsächlich mit a ma klitzakloina Koile um 35,-- Mark aus dem Gschäft naus bin. Erscht, als i wieder auf am Parkplatz im Sicherheitsgurt von meim Auto zur Besinnung komma bin, isch mir's wie Schuppa von de Auga gfalla.

Meine Kinder habet des Zwergfischle in seim Beutele sofort ins Herz gschlossa und ihm bereits an Nama geba. Sie waret so schtolz, dass mir jetzt au zur privi- ligierta Gruppe der Koi-Besitzer aufgschtiega waret.

Um des Koile gleich wieder zurückzubringa und zu reklamiera, isch mir koin rechter Grund eigfalla, schließlich hab i mi ja a dreiviertel Schtund berata lassa. So habet sich also die Petrijünger und -jüngerinn
samt Fang auf dr Hoimweg gmacht. Mir isch der Koi durch mei verwässertes Hirn gschwomma, dass i koin klara Gedanka mehr hab fassa könna. I hab hin- und herüberlegt, wie i diesen Spontan- kauf meiner Frau erklära soll. Doch mei gröschtes Problem bei der Gschicht war noch viel schwieriger zu lösa:

Wo um Himmelswilla grab i mir jetz an Fischteich aus?